მიასთენია myasthenia
მიასთენია – ქრონიკული ნერვულ-კუნთოვანი დაავადება, რომლის ძირითადი გამოვლინებაა კუნთების პათოლოგიური სისუსტე და გადაღლილობა.
მიასთენია – ეტიოლოგია ცნობილი არ არის.
მიასთენია – პათოგენეზი განპირობებულია გამტარობის ბლოკირებით მონონევრული სინაფსის დონეზე. აშკარაა ავტოიმუნური მექანიზმების თანამონაწილეობა. არსებითი როლი ეკუთვნის ფარისებრი ჯირკვლის პათოლოგიას. ავადდებიან უპირატესად ქალები. დაავადების დასაწყისი აღინიშნება ნებისმიერ ასაკში, ძირითადად კი ახალგაზრდებში.
მიასთენია – სიმპტომები, მიმდინარეობა. პირველი ნიშნებია თვალის მამოძრავებელი ნერვის დარღვევები (პტოზი, გარეთა ოფთალმოპლეგია, გაორება), რომლებსაც მოგვიანებით უერთდება კუნთებისა და ჩონჩხის მუსკულატურის პარეზები. პარეზების გამოხატულება ძლიერდება საღამოს საათებში. კუნთების პათოლოგიური გადაღლილობა ვითარდება განმეორებითი მოძრაობების დროს. ამასთან პარეზები ღრმავება ან ვლინდება კუნთების ინტაქტურ ჯგუფებში. ატროფიები, მგრძნობელობისა და რეფლექსების დარღვევები არ აღინიშნება. ხანგრძლივი დროის განმავლობაში მიასთენია შესაძლებელია აღინიშნებოდეს კუნთთა გარკვეულ ჯგუფებში, მაგრამ დროთა განმავლობაში პროცესი გენერალიზდება. ზოგჯერ არახელსაყრელი გარეგანი ფაქტორების ზემოქმედებით ან სპონტანურად წარმოიქმნება სასუნთქი მუსკულატურის სისუსტე, ზოგჯერ ყლაპვის დარღვევებით. აღნიშნული სასიცოცხლო მნიშვნელობის დარღვევები განიხილება როგორც მიასთენური კრიზი. ელექტრომიოგრაფია ავლენს დამახასიათებელ მიასთენურ რეაქციას.
მიასთენია – პროგნოზი. ავადმყოფთა 15-20% იღუპება სუნთქვის უკმარისობის ან სხვა ინტერკურენტული ინფექციებისაგან.
ლიტერატურა, წყაროები, გაფრთხილება
- გაფრთხილება
- დათეშიძე ლალი, შენგელია არჩილ, შენგელია ვასილ. “ქართული სამედიცინო ენციკლოპედია”. თბილისი, 2005. “ტექინფორმის” დეპონენტი N: 1247. თეიმურაზ ჩიგოგიძის რედაქციით.
- დათეშიძე ლალი, შენგელია არჩილ, შენგელია ვასილ; “ქართული სამედიცინო ენციკლოპედია”. მეორე დეპო-გამოცემა. ჟურნალი “ექსპერიმენტული და კლინიკური მედიცინა”. N: 28. 2006. დეპონენტი პროფესორ თეიმურაზ ჩიგოგიძის საერთო რედაქციით.
ლალი დათეშიძე, არჩილ შენგელია. სამედიცინო ენციკლოპედიური განმარტებითი ლექსიკონი
მიასთენია – 1. myasthenia (ნერვ. დაავ.) ხასიათდება აქტიური მოძრაობებისას კუნთების მომატებული დაღლილობებით, რაც ყველაზე მეტად გამოხატულია თვალის, საღეჭ, ხახის და ხორხის კუნთებში. შედეგად ეს იწვევს განმეორებითი მოძრაობების დროს საგნების გაორებას, ქუთუთოების დაშვებას, ღეჭვის და ყლაპვის დარღვევას. დიაგნოზის დასმაში გვეხმარება პროზერინით სინჯი: კანქვეშ 1 მლ 0,05% – იანი ხსნარის შეყვანის შემდეგ დაავადების სიმპტომები რამდენიმე საათით ქრება. არც თუ იშვიათად ავადმყოფებში ვლინდება ფუნქციონირებადი მკერდუკანა ჯირკვლის არსებობა (ჩვეულებრივ ის ატროფირდება სიყმაწვილის პერიოდში) ან ამ ჯირკვლის სიმსივნე 2. (სტომატ.) კუნთოვანი სისუსტე 3. ქრონიკული ნერვ – კუნთოვანი დაავადება, რომელიც დაკავშირებულია ნერვ – კუნთოვანი გამტარობის დარღვევასთან; ხასიათდება სხვადასხვა ჯგუფის კუნთების სისუსტითა და გადაღლით.