ნაადრევი მშობიარობა

ნაადრევი მშობიარობა preterm delivery

ადგილი აქვს ორსულობის 28-ე და 39-ე კვირეებს შორის პერიოდში. მიზეზები ისეთივეა, როგორიც თავისათავადი აბორტის დროს. მშობიარობა ხშირად რთულდება სანაყოფო წყლების ნაადრევი დაღვრით, სამშობიარო მოქმედების სისუსტით და სხვ.

ნაადრევი მშობიარობა – მკურნალობა. საჭიროა მშობიარობის ძალზე ფრთხილად ჩატარება. სამშობიარო მოქმედების სისუსტის დროს საჭირო არ არის ძლიერი მასტიმულირებელი პრეპარატების დანიშვნა, ვინაიდან ძლიერი ჭინთვები შესაძლებელია მიზეზი გახდეს ნაყოფის ტრავმისა. მშობიარობის პირველ პერიოდში, საშვილოსნოს ყელის გახსნისას 4-5 სმ-ით, მიზანშეწონილია სპაზმოლიზური პრეპარატების დანიშვნა, რომელთა შეყვანის განმეორება შეიძლება. მუდმივად ატარებენ ნაყოფის მუცელშიგა ჰიპოქსიის პროფილაქტიკას. ძლიერი სამშობიარო მოქმედება, განსაკუთრებით მეორე პერიოდში საჭიროა შესუსტებულ იქნას ეთერის არაღრმა ნარკოზით; მშობიარობის მეორე პერიოდი უმჯობესია ჩატარდეს მშობიარის გვერდზე წოლის მდგომარეობაში. დღენაკლი ნაყოფის თავზე მენჯის ფსკერის კუნთების ტრავმული ზემოქმედების შემცირების მიზნით მიმართავენ ეპიზიო – ან პერინეოტომიას.

პროფილაქტიკა ისეთივეა, როგორიც თავისთავადი აბორტების დროს. მოსალოდნელი ნაადრევი მშობიარობის დროს ორსულს სასწრაფოდ აგზავნიან სტაციონარში, სადაც ტარდება ღინისძიებები, რომელიც მიმართულია ნაადრევი სამშობიარო მოქმედების შესაჩერებლად.

>> მეანობა


  1. გაფრთხილება
  2. დათეშიძე ლალი, შენგელია არჩილ, შენგელია ვასილ. “ქართული სამედიცინო ენციკლოპედია”. თბილისი, 2005. “ტექინფორმის” დეპონენტი N: 1247. თეიმურაზ ჩიგოგიძის რედაქციით.
  3. დათეშიძე ლალი, შენგელია არჩილ, შენგელია ვასილ; “ქართული სამედიცინო ენციკლოპედია”. მეორე დეპო-გამოცემა. ჟურნალი “ექსპერიმენტული და კლინიკური მედიცინა”. N: 28. 2006. დეპონენტი პროფესორ თეიმურაზ ჩიგოგიძის საერთო რედაქციით.