რბილი შანკრი

რბილი შანკრი

არჩილ შენგელიალალი დათეშიძე

რბილი შანკრი (ulcus molle) ვენერიული დაავადება, რომელიც ვლინდება ძირითადად მტკივნეული რბილი წყლულებით სასქესო ორგანოებზე. გამომწვევია პეტერსენ-დიუკრეის სტრეპტობაცილა. დასნებოვნება ხდება სქესობრივი კონტაქტის დროს. ინკუბაციური პერიოდი გრძელდება 3-4 დღე. გამომწვევის ჩანერგვის ადგილზე წარმოიქმნება პუსტულები, რომლებიც სწრაფად გარდაიქმნებიან წყლულებად. წყლულები ჩვეულებრივ მრავლობითია, მტკივნეული, აქვთ მწვავედ ანთებადი ხასიათი, არასწორი მოხაზულობა, არათანაბარი ღრმა ფსკერი, უხვი ლორწოვან-ჩირქოვანი გამონადენითა და რბილი კაშკაშა-წითელი კიდეებით. ზოგჯერ ინფექცია აღწევს რეგიოალურ ლიმფურ კვანძებში და რის შედეგადაც ვითარდება ლიმფანგიტები და ლიმფადენიტები ჩირქოვანი ფისტულების წარმოქმნით. 2-3 თვის შემდეგ პროცესი მთავრდება დანაწიბურებით. დასუსტებულ ავადმყოფებში აღინიშნება გახანგრძლივებული მიმდინარეობა.

დიაგნოზიდასტურდება ჩირქოვან გამონაყოფში გამომწვევის აღმოჩენით. მკურნალობა. სულფანილამიდები ან ანტიბიოტიკები (საშუალო დოზებით 10 დღის განმავლობაში), წყლულების დამუშავება კალიუმის პერმანგანატის ხსნარით, დეზინფექციური მაზების სახვევები.


  1. გაფრთხილება
  2. დათეშიძე ლალი, შენგელია არჩილ, შენგელია ვასილ. “ქართული სამედიცინო ენციკლოპედია”. თბილისი, 2005. “ტექინფორმის” დეპონენტი N: 1247. თეიმურაზ ჩიგოგიძის რედაქციით.
  3. დათეშიძე ლალი, შენგელია არჩილ, შენგელია ვასილ; “ქართული სამედიცინო ენციკლოპედია”. მეორე დეპო-გამოცემა. ჟურნალი “ექსპერიმენტული და კლინიკური მედიცინა”. N: 28. 2006. დეპონენტი პროფესორ თეიმურაზ ჩიგოგიძის საერთო რედაქციით

კანისა და ვენერიული დაავადებები