ლალი დათეშიძე
ადამიანის ნორმალური ანატომია. ქალის გარეთა სასქესო ორგანოები Partes genitales externae; External male genital organs
დიდი სასირცხო ბაგეები – labium majus pudendi ერთმანეთში გარდამავალი კანის ორი მორგვია, რომლებიც უკან, ყითას წინ ერთდებიან, წინ კი ბოქვენის სიმფიზთან ქმნიან ბოქვენის მაღლობს – mons pubis. ბაგეების შეერთების ადგილს შესართავები – commissurae ეწოდება. შესართავის წინ მდებარეობს განივი ნაოჭი – სასირცხო ბაგის ლაგამი – frenulum labiorum pudendi, რომელიც შემოსაზღვრავს საშოს კარიბჭის ფოსოს – fossa vestibuli vaginae. დიდი სასირცხო ბაგეების შიგნით მდებარეობს მცირე სასირცხო ბაგეები – labia minora pudendi.
რომლებიც საშოს ხვრელის წინა ბოლოსთან იყოფა ორ ნაოჭად. ნაოჭთა ერთი წყვილი უმაგრდება კლიტორს ქვემოდან და ქმნის კლიტორის ლაგამს – frenulum clitoridis; მეორე წყვილი კი კლიტორს ფარავს ზემოდან და მას კლიტორის ჩუჩას – preputium clitoridis ეწოდება. კლიტორის – clitoris სიგრძე 3 – 4 სმ-ია; შედგება ბოქვენის ძვლის დასწვრივ ტოტებთან დამაგრებული ორი მღვიმოვანი სხეულისაგან – corpora cavernosa clitoridis. კლიტორში გაგანიერებულ წინა ბოლოს – კლიტორის თავი – glans clitoridis ეწოდება; მის ქვემოთ მდებარეობს შარდსადენის გარეთა ხვრელი. მცირე სასირცხო ბაგეებს შორის მოქცეულ სასქესო ნაპრალის ნაწილს საშოს კარიბჭე – vestibulum vaginae ეწოდება. მცირე სასირცხო ბაგეების ქვეშ მდებარეობს ბოლქვ-მღვიმოვანი კუნთის ბოჭკოები. ამ კუნთის ქვეშ კი ვენური სისხლძარღვების წნულია, რომელსაც კარიბჭის ბოლქვს – bulbus vestibuli უწოდებენ. ბოლქვის უკან, ლორწოვანი ქვეშ მდებარეობს კარიბჭის ჯირკვლები – glandula vestibularis major, რომლებიც გრძელი სადინრით იხსნება ნავისებრ ფოსოში.
გვერდ–სტატიის მომზადებაზე მუშაობდნენ: ლალი დათეშიძე (1997 წლიდან), არჩილ შენგელია, ლევან შენგელია, (1998 წლიდან), მანანა კიკნაძე (2006 წლიდან), ამირან დათეშიძე (2006 წლიდან), ვასილ შენგელია (2006 წელს), თამარ პაპავა (2008 წლიდან). 2008 წლის რედაქცია მოამზადა მანანა კიკნაძემ.
Viewed 7773 times by 4171 viewers
Posted in ნორმალური ანატომია |
