ლალი დათეშიძე, არჩილ შენგელია. სამედიცინო ენციკლოპედიური განმარტებითი ლექსიკონი
სინციტიური ტროფობლასტი – (syncytiotrophoblastus, syntrophoblastus) ადამიანის ჩანასახის ტროფობლასტის გარეთა სიმპლასტური ნაწილი, რომელიც იმპლანტაციის პროცესში წარმოიქმნება და მკვეთრად გამოხატული ჰიდროლიზური და ინვაზიური თვისებების გამო უზრუნველყოფს იმპლანტაციას. იმპლანტაციის პროცესში ბლასტოციტის პირველადი ტროფობლასტი (ციტოტროფობლასტი – cytotrophoblastus) ლორწოვან გარსთან შეხების ადგილას გარდაიქმნება პლაზმოდიოტროფობლასტად – ინვაზიურ პლაზმოდიუმად, ტროფობლასტს ზედაპირზე უვითარდება გამონადრეკები – პირველადი ხაოები (ვილლუს პრიმარიუს). ამ უკანასკნელს მეზენქიმას ჩაზრდის შემდეგ მეორეული (villus secundarius) ეწოდება. ტროფობლასტს მრავალი ფუნქცია აქვს; ინვაზიური (პროტეოლიზური ფერმენტების გამომუშავება, რომლებიც უზრუნველყოფენ გამონადრეკთა და განტოტებათა ჩამყნობას საშვილოსნოს ლორწოვან გარსში), ნივთიერებათა ცვლას (უზრუნველყოფს აირთა ცვლას დედის სისხლთან, ჩანასახის კვებას და სხვ.). ენდოკრინული – ორსულობის დროს საკვერცხისა და საშვილოსნოს ლორწოვანი გარსის ფუნქციური მდგომარეობის შესანარჩუნებლად. ასე რომ, ტროფობლასტი უზრუნველყოფს ჩანასახის განვითარების ადრეულ ეტაპებსა და იმპლანტაციას. იგი პლაცენტის ნაყოფისეული ნაწილის შემადგენელი ნაწილია. (ც. გაჩეჩილაძე, ნ. ჩიკვილაძე. ჰისტოლოგიის, ციტოლოგიის და ემბრიოლოგიის ტერმინთა განმარტებითი ლექსიკონი.”თბ.,”ცოდნა”.2000 წ.)
ბმულები: 1.საავტორო ფარმაცევტული სკოლა 2.სამედიცინო ლიტერატურა
3.დიეტები 4.ორსულობა და მშობიარობა