ჰისტოგენეზი

ლალი დათეშიძე, არჩილ შენგელია. სამედიცინო ენციკლოპედიური განმარტებითი ლექსიკონი

ჰისტოგენეზი – (histogenesis ბერძნ. histos  –  ქსოვილი და genesis  –  განვითარება)  –  ქსოვილის განვითარება ემბრიონული საწყისების უჯრედული მასალისაგან. ჰისტოგენეზს ახასიათებს უჯრედის სპეციალიზაციასთან დაკავშირებული უჯრედოვანი დიფერენცირების გაძლიერება. ამას თან სდევს ბირთვულ – ციტოპლაზმური დამოკიდებულების გადახრა ბირთვის ზომასთან შედარებით ციტოპლაზმის ზომის მკვეთრი მატებისკენ, რაც სულ უფრო შესამჩნევი ხდება. ყოველგვარი ჰისტოგენეზის შინაარსია შემდეგი სამი კანონზომიერი მომენტი: 1. ქსოვილოვანი დეტერმინაცია, ანუ უჯრედების თვისებათა მემკვიდრეობითი განმტკიცება, რასთან დაკავშირებითაც შეუძლებელია მათი ბუნების შეცვლა და სხვა ქსოვილების უჯრედებად გარდაქმნა; 2. ინტეგრაცია, ანუ უჯრედებს შორის მჭიდრო კავშირის შექმნა და მათი განვითარების ურთიერთგაპირობება; 3. ჰეტეროქრონია, ანუ უჯრედების არაერთდროული დიფერენცირება. ჰისტოგენეზის ეს სამი პრინციპი აღწერეს ს.ი.შჩელკუნოვმა და მისმა თანამშრომლებმა. (ც. გაჩეჩილაძე, ნ. ჩიკვილაძე. ჰისტოლოგიის, ციტოლოგიის და ემბრიოლოგიის ტერმინთა განმარტებითი ლექსიკონი.”თბ.,”ცოდნა”.2000 წ.)

გაფრთხილება!

 

Share on Facebook
Facebook
გააზიარე Facebook -ზე ..