ენალაპრილი

ენალაპრილი

ენალაპრილის ზოგადი ინფორმაცია

ენალაპრილი. ENALAPRIL. ანგიოტენზინ-გარდაქმნელი ფერმენტების ინჰიბიტორების ჯგუფის სამკურნალო საშუალება. აქტიური ნივთიერება – ენალაპრილის მალეატი. Enalapril maleate. ათქ.კლასიფიკაციის კოდი – C09AA02. მწარმოებელი ფირმა – შპს “ბიოპოლუსი” (საქართველო).

ენალაპრილის შემადგენლობა და გამოშვების ფორმა

ენალაპრილი. ENALAPRIL გამოდის 10 მგ ტაბლეტის ფორმით. 1 ტაბლეტი შეიცავს ენალაპრილის მალეატს _ 10 მგ-ს. დამხმარე ნივთიერებებია: სიმინდის სახამებელი, ლაქტოზა, მაგნიუმის სტეარატი, ტალკი, ნატრიუმის სახამებლის გლიკოლატი.

ენალაპრილის ფასები ქართულ ფარმაცევტულ ბაზარზე

ენალაპრილის ფასები ფარმადეპოში
ენალაპრილის ფასები ავერსში
ენალაპრილის ფასები psp-ში
ენალაპრილის ფასები სხვა აფთიაქებში

ინფორმაცია სხვა პრეპარატების შესახებ, რომლებიც იგივე მოქმედ ნივთიერებებს შეიცავენ, რასაც ენალაპრილი, იხილეთ ქვემოთ, შესაბამის რუბრიკაში.აფთიაქებს დინამიური ინფორმაცია ენალაპრილის ფასების შესახებ შეუძლიათ მოგვაწოდონ  mpifarm@gmail.com

ენალაპრილის აქტიური ნივთიერება

ენალაპრილის მალეატი. Enalapril maleate. ქიმიური დასახელება– (S)-1-[N-[1-(ეთოქსიკარბონილ)-3-ფენილპროპილ]-L-ალანილ]-L-პროლინი (მალეატის სახით). ენალაპრილის მალეატს მიაკუთვნებენ აგფ-ის ინჰიბიტორების ჯგუფს.

ენალაპრილის სინონიმები

ბერლიპრილი 10 (Berlipril 10, Berlin-Chemie Menarini, გერმანია), ბერლიპრილი 20 (Berlipril 20, Berlin-Chemie Menarini, გერმანია), ბერლიპრილი 5(Berlipril 5, Berlin-Chemie Menarini, გერმანია),  ედნიტი (EDNYT, Gedeon Richter, უნგრეთი), ენა-დენკი 20 (Ena-Denk 20, Denk Pharma. გერმანია), ენალაპრილი (ENALAPRIL, GMP, საქართველო), ენაჰექსალი (EnaHexal, NOVARTIS CONSUMER HEALTH S.A., გერმანია), ენალაპრილი (ENALAPRIL, Hemofarm A.D, სერბეთი).

ენალაპრილის გამოყენების ძირითადი მიმართულებებია

  • ჰიპერტენზია არტერიული
  • ჰიპერტენზია რენოვასკულარული
  • გულის უკმარისობა ქრონიკული
  • მარცხენა პარკუჭის დისფუნქცია, უსიმპტომო

ენალაპრილის საფირმო აღწერიდან

ენალაპრილის ფარმაკოლოგიური თვისებები

ენალაპრილი ანტიჰიპერტენზიული საშუალებაა. ორგანიზმში ენალაპრილის ჰიდროლიზის შედეგად წარმოიქმნება მისი აქტიური მეტაბოლიტი _ ენალაპრილატი, რომელიც აგფ-ის უფრო აქტიური ინჰიბიტორია, ვიდრე ენალაპრილი. ენალაპრილატი იწვევს ანგიოტენზინ I-ის ანგიოტენზინ II-ად გარდაქმნის სიჩქარის შემცირებას. ანგიოტენზინ II-ის კონცენტრაციის შემცირების შედეგად იზრდება პლაზმის რენინის აქტივობა და მცირდება ალდოსტერონის სეკრეცია, რაც იწვევს სისხლძარღვთა საერთო პერიფერიული წინააღმდეგიბის, სისტოლური და დიასტოლური არტერიული წნევის, მიოკარდიუმზე პრე – და პოსტდატვირთვის შემცირებას.

ენალაპრილის ფარმაკოკინეტიკა

პერორალური მიღებისას კუჭ-ნაწლავის ტრაქტიდან შეიწოვება ენალაპრილის დაახლოებით 60%. საკვების მიღება არ მოქმედებს პრეპარატის შეწოვაზე. ენალაპრილი მეტაბოლიზდება ღვიძლში აქტიური მეტაბოლიტის _ ენალაპრილატის წარმოქმნით. ენალაპრილატის მაქსიმალური კონცენტრაცია (Cmax) პლაზმაში 3_4 სთ-ში მიიღწევა, ენალაპრილის _ 1 სთ-ში. სტაბილური კონცენტრაციები შრატში 4 დღის შემდეგ მიიღწევა. ენალაპრილატის 50_60% უკავშირდება პლაზმის ცილებს. იგი ადვილად გადის ჰისტოჰემატურ ბარიერებს, ჰემატოენცეფალური ბარიერის გარდა; მცირე რაოდენობით აღწევს პლაცენტაში და გადადის დედის რძეში. ენალაპრილატის ნახევარგამოყოფის პერიოდი (T1/2) 11 სთ-ია. პრეპარატი გამოიყოფა ძირითადად თირკმლებით _ 60% (20% _ ენალაპრილის სახით, 40% _ ენალაპრილატის სახით); განავლით _ 33% (6% _ ენალაპრილის სახით, 27% _ ენალაპრილატის სახით). პრეპარატი გამოიყოფა ჰემოდიალიზით და პერიტონეალური დიალიზით.
ფარმაკოკინეტიკა განსაკუთრებულ კლინიკურ შემთხვევებში: ენალაპრილატის T1/2 გაზრდილია თირკმლის უკმარისობის დროს.

ენალაპრილის ჩვენებები

• არტერიული ჰიპერტენზია (მათ შორის, რენოვასკულარული);
• გულის ქრონიკული უკმარისობა (კომბინირებული თერაპიის შემადგენლობაში);
• მარცხენა პარკუჭის უსიმპტომო დისფუნქცია (კომბინირებული თერაპიის შემადგენლობაში).
მიღების წესები და დოზები
ენალაპრილი მიიღება პერორალურად, ჭამის დროს ან ჭამის შემდეგ, მცირე რაოდენობის სითხესთან ერთად.
არტერიული ჰიპერტენზიის მკურნალობა: რეკომენდებული საწყისი დოზაა 5 მგ ერთხელ დღეში. კლინიკური ეფექტის მიხედვით 1_2 კვირის შემდეგ შესაძლებელია დოზის 5 მგ-ით გაზრდა. ჩვეულებრივ, შემანარჩუნებელი დოზა 10_20 მგ-ს შეადგენს. აუცილებლობისას სადღეღამისო დოზა 40 მგ-მდე იზრდება. ამ შემთხვევაში შესაძლებელია დოზის ორ მიღებაზე გაყოფა.
პაციენტებში, რომლებმაც მკურნალობის დაწყებამდე ვერ შეძლეს დიურეზულების მიღების შეწყვეტა, ასევე ჰიპონატრიემიის (ნატრიუმის იონების კონცენტრაცია შრატში < 130 მმოლი/ლ ან კრეატინინის კონცენტრაცია შრატში > 0.14 მმოლი/ლ) დროს ენალაპრილის საწყისი დოზაა 2.5 მგ ერთხელ დღეში. ხანდაზმულ პაციენტებში რეკომენდებული საწყისი დოზა შეადგენს 1.25 მგ-ს ერთხელ დღეში.
გულის ქრონიკული უკმარისობის მკურნალობა: რეკომენდებული საწყისი დოზაა 2.5 მგ ერთხელ დღეში. დოზა თანდათანობით იზრდება, მაქსიმალური კლინიკური ეფექტის მიღებამდე; ჩვეულებრივ, 2_4 კვირის შემდეგ. შემანარჩუნებელი დოზაა 2.5_10 მგ ერთხელ დღეში. მაქსიმალური სადღეღამისო დოზაა 40 მგ, რომელიც ორ მიღებაზე იყოფა.
მარცხენა პარკუჭის უსიმპტომო დისფუნქციის მკურნალობა: რეკომენდებული საწყისი დოზაა 2.5 მგ 2-ჯერ დღეში, შემანარჩუნებელი _ 10 მგ 2-ჯერ დღეში.
არტერიული ჰიპერტენზიის მკურნალობა თირკმლის დაავადებების დროს: პრეპარატი ინიშნება კრეატინინის კლირენსის მიხედვით. თუ კრეატინინის კლირენსი 30 მლ/წთ-ზე მეტია პრეპარატის საწყისი დოზაა 5 მგ ერთხელ დღეში, თუ კრეატინინის კლირენსი 30 მლ/წთ-ზე ნაკლებია _ 2.5 მგ ერთხელ დღეში. ჰემოდიალიზზე მყოფ პაციენტებში ჰემოდიალიზის დღეს ინიშნება _ 2.5 მგ ერთხელ დღეში, სხვა დღეებში დოზირების რეჟიმის კორექცია ხდება ექიმის მიერ, არტერიული წნევის მაჩვენებლების მიხედვით.

ენალაპრილის გვერდითი მოვლენები

ნერვული სისტემის მხრივ: დაღლილობა, თავბრუხვევა, თავის ტკივილი; ძალზე იშვიათად, მაღალი დოზების გამოყენებისას _ ძილის დარღვევა, დეპრესია, ჰალუცინაციები, შუილი ყურებში. გულ-სისხლძარღვთა სისტემის მხრივ: ორთოსტატიკური ჰიპოტენზია, სინკოპე, არტერიული ჰიპოტენზია, გულის ფრიალი, ტკივილი გულის არეში; ძალზე იშვიათად, მაღალი დოზების გამოყენებისას _ სტენოკარდია, არითმიები, ფილტვის არტერიის ტოტების თრომბოემბოლია, რეინოს სინდრომი.
საჭმლის მომნელებელი სისტემის მხრივ: გულისრევა; იშვიათად _ პირის სიმშრალე, აბდომინალური ტკივილი, ღებინება, დიარეა, ყაბზობა, ღვიძლის ტრანსამინაზების აქტივობის მომატება, ჰიპერბილირუბინემია, ჰეპატიტი, პანკრეატიტი; ძალზე იშვიათად, მაღალი დოზების გამოყენებისას _ გლოსიტი.
სისხლმბადი სისტემის მხრივ: იშვიათად _ ნეიტროპენია; აუტოიმუნური დაავადებების მქონე პაციენტებში _ აგრანულოციტოზი.
შარდგამომყოფი სისტემის მხრივ: იშვიათად _ თირკმლის ფუნქციის დარღვევა, პროტეინურია. ალერგიული რეაქციები: იშვიათად _ გამონაყარი კანზე, კვინკეს შეშუპება.
სხვა: მშრალი ხველა; იშვიათად _ ჰიპერკალემია, კრუნჩხვები; ძალზე იშვიათად, მაღალი დოზების გამოყენებისას _ ალოპეცია, იმპოტენცია.

ენალაპრილის უკუჩვენებები

• მომატებული მგრძნობელობა ენალაპრილის, პრეპარატის სხვა კომპონენტების ან აგფ-ის სხვა ინჰიბიტორების მიმართ;
• პორფირია;
• ანგიონევროზული შეშუპება ანამნეზში;
• 18 წლამდე ასაკი (ეფექტურობა და უსაფრთხოება დადგენილი არ არის).
ორსულობა და ლაქტაცია
ორსულობის დროს და ლაქტაციის (ძუძუთი კვების) პერიოდში პრეპარატის გამოყენება უკუნაჩვენებია.

ენალაპრილის განსაკუთრებული მითითებები

პრეპარატი სიფრთხილით გამოიყენება (არტერიული ჰიპოტენზიის განვითარების რისკის გამო) თირკმლის არტერიების ორმხრივი სტენოზის ან ერთადერთი თირკმლის არტერიის სტენოზის დროს; პირველადი ჰიპერალდოსტერონიზმის, ჰიპერკალიემიის, თირკმლის ტრანსპლანტაციის შემდგომი მდგომარეობის, აორტული ან მიტრალური სტენოზის, იდიოპათიკური ჰიპერტროფიული სუბაორტული სტენოზის, შემაერთებელი ქსოვილის სისტემური დაავადებების, გულის იშემიური დაავადების, ცერებროვასკულური დაავადებების, შაქრიანი დიაბეტის, თირკმლის უკმარისობის (პროტეინურია > 1 გ/დღეში), ღვიძლის უკმარისობის დროს; ასევე ჰემოდიალიზზე ან უმარილო დიეტაზე მყოფ პაციენტებში, იმუნოდეპრესანტებისა და სალურეტიკების ერთდროული მიღებისას, ხანდაზმულ (65 წელზე მეტი ასაკის) პაციენტებში.
მკურნალობის დაწყებამდე და თერაპიის დროს საჭიროა თირკმლის ფუნქციის მონიტორინგი. რეკომენდებულია პერიფერიული სისხლის სურათის (ლეიკოციტების) კონტროლი. ქირურგიული ჩარევის წინ საჭიროა ექიმის ინფორმირება ენალაპრილის გამოყენების შესახებ. მკურნალობის დროს საჭიროა თავის არიდება ალკოჰოლური სასმელების მიღებისაგან, რადგან ეთანოლი აძლიერებს არტერიულ ჰიპოტენზიას.
პრეპარატის მიღების გამოტოვებისას საჭიროა რაც შეიძლება სწრაფად გამოტოვებული დოზის მიღება. იმ შემთხვევაში, თუ მორიგი დოზის მიღებამდე რამდენიმე საათი რჩება, მიიღება მხოლოდ ეს დოზა, ხოლო გამოტოვებული დოზა აღარ მიიღება. დაუშვებელია დოზის გაორმაგება. დოზის კორექცია ავადმყოფის მდგომარეობის მიხედვით ექიმის მიერ ხდება.
პრეპარატის ზემოქმედება ავტოტრანსპორტისა და მექანიზმების მართვის უნარზე: პრეპარატმა ზოგიერთ პაციენტებში შეიძლება გამოიწვიოს გამოხატული არტერიული ჰიპოტენზია და თავბრუხვევა, განსაკუთრებით, მკურნალობის დასაწყისში, რაც ახდენს გავლენას ავტოტრანსპორტისა და მექანიზმების მართვის უნარზე.

ენალაპრილის ჭარბი დოზირება

სიმპტომები: მკვეთრი არტერიული ჰიპოტენზია, მიოკარდიუმის ინფარქტის განვითარება, თავის ტვინის სისხლის მიმოქცევის მწვავე დარღვევები ან თრომბოემბოლური გართულებები, კრუნჩხვები, სტუპორი.
მკურნალობა: მსუბუქი შემთხვევების დროს _ კუჭის ამორეცხვა და პერორალურად მარილიანი ხსნარის მიღება; მძიმე შემთხვევებისას _ ვენაში ნატრიუმის ქლორიდის იზოტონური ხსნარის, პლაზმის შემცვლელების შეყვანა, აუცილებლობისას _ ვენაში ანგიოტენზინ II-ის შეყვანა, ჰემოდიალიზი (ენალაპრილატის გამოყოფის სიჩქარეა 62 მლ/წთ, სისხლის შრატში ენალაპრილის შემცველობის დონე 4 სთ-იანი ჰემოდიალიზის შემდეგ 45_57%-ით მცირდება).
სხვა წამლებთან ურთიერთქმედება
ენალაპრილისა და დიურეზულების ან სხვა ჰიპოტენზიური საშუალებების ერთდროული გამოყენებისას ამ პრეპარატების ეფეტურობა იზრდება.
ენალაპრილისა და ზოგიერთი დიურეზულების (მაგ., სპირონოლაქტონი, ამილორიდი, ტრიამტერენი) ან/და კალიუმის შემცველი პრეპარატების ერთდროული გამოყენებისას შესაძლებელია ჰიპერკალემიის განვითარება.
ოპოიდური ანალგეტიკები და სანარკოზე საშუალები აძლიერებენ ენალაპრილის ანტიჰიპერტენზიულ მოქმედებას.
ენალაპრილისა და ანთების საწინააღმდეგო არასტეროიდული საშუალებების ერთდროული გამოყენებისას შესაძლებელია ენალაპრილის ეფექტურობის შემცირება და თირკმლის ფუნქციის დარღვევის რისკის გაზრდა.
ენალაპრილი ასუსტებს თეოფილინის შემცველი საშუალებების მოქმედებას.
ლითიუმის შემცველი პრეპარატების ერთდროულმა გამოყენებამ შეიძლება ლითიუმის გვერდითი ეფექტები გააძლიეროს.
ციმეტიდინის შემცველი პრეპარატები ახანგრძლივებენ ენალაპრილის მოქმედებას.

ენალაპრილის შენახვის პირობები და ვადები

ინახება მშრალ ადგილას, არა უმეტეს 25°C ტემპერატურაზე.
ინახება ბავშვებისათვის მიუწვდომელ ადგილას.
ვარგისობის ვადა: 3 წელი.
შეფუთვაზე აღნიშნული ვადის გასვლის შემდეგ პრეპარატის გამოყენება დაუშვებელია.

ენალაპრილის გაცემის წესი

ფარმაცევტული პროდუქტის ჯგუფი II (გაიცემა რეცეპტით).