ანგინისშემდგომი გართულებები

ანგინისშემდგომი გართულებები

ანგინისშემდგომი გართულებები, ანგინისშემდგომი გართულებები – პარატონზილიტი, ანგინისშემდგომი გართულებები – რეტროფარინგული აბსცესი >>>

ანგინა სტატისტიკურად ყველაზე ხშირი დაავადებაა, რომლის მკურნალობაც ერთი შეხედვით მარტივია და ყველამ იცის, თუმცა დაავადება საშიშია არა მისი მიმდინარეობის, არამედ მისი გართულებების გამო. ანგინის გართულებები მისი ნებისმიერი სახის დროს შეიძლება განვითარდეს და ძირითადად მოიცავს გულის, სახსრების, ღვიძლისა და თირკმლების დაზიანებას, ანგინისშემდგომ ადგილობრივ გართულებებს კი მიეკუთვნება მწვავე ოტიტი, ხორხის შეშუპება, პარატონზილიტიდა  ხახისუკანა აბსცესი.

ანგინისშემდგომი გართულებები – პარატონზილიტი

ყველაზე ხშირი გართულება პარატონზილიტია, რომელიც შესაძლოა განვითარდეს როგორც კატარული, ისე ფოლიკულური და ლაკუნური ანგინის დროს. როგროც წესი პარატონზილიტი ვითარდება მას შემდეგ რაც ანგინის ყველა კლინიკური ნიშანი ქრება. მისი მიზეზია არასათანადო მკურნალობა: წოლითი რეჟიმის დარღვევა, გადაცივება, სამკურნალო საშუალებების დროზე ადრე შეწყვეტა.

პარატონზილიტისი განვითარებისას წარმოიქმნება ჩირქგროვა, კლინიკურად აღინიშნება სხეულის ტემპერატურის უეცარი მატება, ყელის არეში წვის შეგრძნება, განსაკუთრებით ყლაპვისას. ტკივილი გადეცემა ყურის მიდამოზეც, შეშუპებულია სასა, ირღვევა მეტყველება, ხდება გაურკვეველი, დუდღუნა. დამახასიათებელია ძლიერი ნერწყვდენა. ნუშურებზე შეინიშნება ყვითელი ფერის ჩირქოვანი ნადები.

პარატონზილიტი საჭიროებს სასწრაფო სამედიცინო დახმარებას, რადგანაც მდგომარეობის გაუარესება სწრაფად ხდება, ვითარდება ძლიერი ინტოქსიკაცია. დაავადება გრძელდება ერთი კვირის მანძილზე და თუ ამ ხნის განმავლობაში მდგომარეობა არ გაუმჯობესდა, საჭიროა ჩირქგროვის ქირურგიული გახსნა.

ანგინისშემდგომი გართულებები – რეტროფარინგული აბსცესი

ანგინის კიდევ ერთი გართულებაა ხახისუკანა აბსცესი. (რეტროფარინგული აბსცესი), რომელიც ყველაზე ხშირად გვხვდება პატარა ბავშვებში. ხახისუკანა აბსცესის დროს ირგვლივ მდებარე ლიმფურ კვანძებში  აღინიშნება ჩირქოვანი პროცესი. დაავადება მიმდინარეობს ძლიერი ტკივილებით ყელის არეში, განსაკუთრებით ყლაპვისას. არის შემთხვევები, როდესაც ირღვევა სუნთქვის პროცესი. ავადმყოფი ბავშვი უარს ამბობს კვებაზე, ყლაპვისას იწყება ხველა, ხშირად ხდება საკვების სასულეში გადაცდენა, სითხის  მოხვედრა ცხვირ-ხახაში. ხახისუკანა აბსცესის დროს იშვიათია სხეულის ტემპერატურის მატება.

კისრის ლიმფური კვანძები ხდება შესიებული და მტკივნეული, რის გამოც ტკივილის შესამსუბუქებლად ბავშვი ცდილობს თავის უკან გადაგდებას.

ხახისუკანა აბსცესი საშიშია იმით, რომ შესაძლოა გახდეს ხორხის მიდამოს შევიწროების და სუნთქვის გაძნელების, მოხრჩობის მიზეზი. ამის გამო აუცილებელია დაუყონებლივ მოხდეს აბსცესის გახსნა.

ფარმაკოთერაპია და პრეპარატები: ფარმაცევტული ფირმების წარმომადგენლებს შეუძლიათ ინფორმაცია მოგვაწოდონ ელფოსტაზე mpifarm@gmail.com

ფიტოთერაპია: იხილეთ კლინიკური და ემპირიული ფიტოთერაპია

ვის მივმართოთ – იხ. მედიკოსთა პერსონალური გვერდები

თემატურად მომიჯნავე სტატიები

საავტორო უფლებები და რეკლამა პოსტ-სტატიაზე: მასალა წარმოადგენს “არჩილ შენგელიას და ლალი დათეშიძის სამედიცინო ენციკლოპედიის” ნაწილს. საავტორო უფლებები დაცულია. სტატიის გამოყენებისათვის, აგრეთვე მასზე ბანერის განსათავსებლად მიმართეთ mpifarm@gmail.com

ლიტერატურა, წყაროები, გაფრთხილება

  1. გაფრთხილება
  2. დათეშიძე ლალი, შენგელია არჩილ, შენგელია ვასილ. “ქართული სამედიცინო ენციკლოპედია”. თბილისი, 2005. “ტექინფორმის” დეპონენტი N: 1247. თეიმურაზ ჩიგოგიძის რედაქციით.
  3. დათეშიძე ლალი, შენგელია არჩილ, შენგელია ვასილ; “ქართული სამედიცინო ენციკლოპედია”. მეორე დეპო-გამოცემა. ჟურნალი “ექსპერიმენტული და კლინიკური მედიცინა”. N: 28. 2006. დეპონენტი პროფესორ თეიმურაზ ჩიგოგიძის საერთო რედაქციით. სარედაქციო კოლეგია: ჭუმბურიძე ვახტანგ, კორძაია დიმიტრი, მალაზონია მარინა, ვაჭარაძე კახა, ტყეშელაშვილი ბესარიონ.
  4. Большая медицинская энциклопедия; Москва, издательство ,,Советская энциклопедия” – 1988

ყელ-ყურ-ცხვირის დაავადებები