ლენტიგო

ლენტიგო

ლენტიგო (ლათ.lentigo – მუხუდოსებური ლაქოვანება, ჭორფლი) – კეთილთვისებიანი პიგმენტური ლაქებია, რომელიც განპირობებულია მელანინის პიგმენტის დაგროვებით ეპიდერმისის ბაზალურ შრესა და დერმის ქრომატოფორებში. მიეკუთვნება ნევუსების ჯგუფს. ისინი შესაძლოა იყოს თანდაყოლილი, მათ შორის გენეტიკურად განპირობებული, ან შეძენილი.

ლენტიგო წარმოადგენს 1,5-2,0 სმ დიამეტრის მქონე მომრგვალო ან წაგრძელებული ფორმის მრავლობით პიგმენტურ ლაქებს, რომელთაც აქვთ მოყვითალო ან მუქი-მოშავო ფერი. ისინი ბრტყელია უპირატესად, თუმცა შესაძლოა წამოწეულიც იყოს კანის ზედაპირიდან. თანდაყოლილ ლენტიგოს აქვს დიდი ზომები. მალიგნიზაცია ხდება უკიდურესად იშვიათ შემთხვევბში და ამ დროს ადგილი აქვს ხოლმე ქავილს, აქერცვლას, გაწითლებას, ზომაში მატებასა და ლენტიგოს ფერის ცვლილებას. მის განვითარებას ხელს უწყობს ტრავმატიზაცია.

ლენტიგოს გავრცელებული ფორმები არც თუ იშვიათად იწოდება, როგორც ლენტიგინოზი. თანდაყოლილი ლენტიგინოზი გადაეცემა აუტოსომურ-დომინანტური ტიპით და ახასიათებს ბავშვის კანზე (სახის გამოკლებით) მრავლობითი წვრილი, ყავისფერი ლაქების გაჩენა. კანის დაზიანებები თან ახლავს განვითარების ანომალიებს (თანდაყოლილი სიყრუე, გულის მანკი, ხერხემლის არხის გაფართოება და სხვ.). ყველაზე დიდი პრაქტიკული მნიშვნელობა აქვს პერიორიფიციალურ ლენტიგინოზს, რომლის დროსაც დაბადებისთანავე, ან ოდნავ მოგვიანებით ჩნდება წვრილი, მრავლობითი პიგმენტური ლაქები ტუჩებზე, პირის გარშემო, პირის ღრუს ლორწოვან გარსებზე და ასევე უკანა გასავლის მიდამოში. 10-30 წლისათვის პაციენტებს უვითარდებათ ნაწლავის პოლიპოზი (უხშირესად წვრილი ნაწლავის), კუჭის პოლიპოზი, რომელიც მიდრეკილია მალიგნიზაციისაკენ (პეიტც-ეგერს-ტურენის სინდრომი).

შეძენილი ლენტიგინოზი ვითარდება ღვიძლის ფუნქციის დარღვევისას, ასევე მოხუჩებულთა ასაკში.

გაურთულებელ შემთხვევებში მკურნალობა არ ტარდება. გამონაყარი ელემენტი, რომლის ტრავმირებაც მოხდა, უმჯობესია ამოიკვეთოს ქირურგიული გზით ან ჩატარდეს ლაზერული ან კრიოდესტრუქცია. პეიტც-ეგერს-ტურენის სინდრომის დროს პოლიპოზის ოპერატიული მკურნალობა იწვევს ლენტიგოს რეგრესირებას.

პროგნოზი, როგორც წესი, კეთილსაიმედოა. მალიგნიზაციის პროფილაქტიკის მიზნით რეკომენდებულია პაციენტებმა თავი აარიდონ ლენტიგოს ელემენტების  ინსოლაციასა და ტრავმატიზაციას. პირველადი პროფილაქტიკა შემუშავებული არაა.

ფარმაკოთერაპია და პრეპარატები: ფარმაცევტული ფირმების წარმომადგენლებს შეუძლიათ ინფორმაცია მოგვაწოდონ ელფოსტაზე mpifarm@gmail.com

ფიტოთერაპია: იხილეთ კლინიკური და ემპირიული ფიტოთერაპია

ვის მივმართოთ – იხ. მედიკოსთა პერსონალური გვერდები

თემატურად მომიჯნავე სტატიები

საავტორო უფლებები და რეკლამა პოსტ-სტატიაზე: მასალა წარმოადგენს “არჩილ შენგელიას და ლალი დათეშიძის სამედიცინო ენციკლოპედიის” ნაწილს. საავტორო უფლებები დაცულია. სტატიის გამოყენებისათვის, აგრეთვე მასზე ბანერის განსათავსებლად მიმართეთ mpifarm@gmail.com

ლიტერატურა, წყაროები, გაფრთხილება

  1. გაფრთხილება
  2. დათეშიძე ლალი, შენგელია არჩილ, შენგელია ვასილ. “ქართული სამედიცინო ენციკლოპედია”. თბილისი, 2005. “ტექინფორმის” დეპონენტი N: 1247. თეიმურაზ ჩიგოგიძის რედაქციით.
  3. დათეშიძე ლალი, შენგელია არჩილ, შენგელია ვასილ; “ქართული სამედიცინო ენციკლოპედია”. მეორე დეპო-გამოცემა. ჟურნალი “ექსპერიმენტული და კლინიკური მედიცინა”. N: 28. 2006. დეპონენტი პროფესორ თეიმურაზ ჩიგოგიძის საერთო რედაქციით. სარედაქციო კოლეგია: ჭუმბურიძე ვახტანგ, კორძაია დიმიტრი, მალაზონია მარინა, ვაჭარაძე კახა, ტყეშელაშვილი ბესარიონ.
  4. Большая медицинская энциклопедия; Москва, издательство ,,Советская энциклопедия” – 1988

Share on Facebook
Facebook
გააზიარე facebook -ზე ..