მწვავე მასტოიდიტი

მწვავე მასტოიდიტი

მასტოიდიტი მწვავე (acute mastoiditis) – საფეთქლის ძვლის დვრილისებრი მორჩის მწვავე ანთება; ხშირად წარმოადგენს შუა ყურის მწვავე ჩირქოვანი ანთების გართულებას (მეორადი მასტოიდიტი). პირველადი მასტოიდიტი ვითარდება როგორც დამოუკიდებელი დაავადება.

მასტოიდიტი მწვავე – სიმპტომები, მიმდინარეობა. აღინიშნება დვრილისებრი მორჩის გარეთა საფარვლის ტკივილი, შეშუპება და ჰიპერემია, ყურიდან ჩირქდენა. ოტოსკოპიით გარეთა სასმენი მილი შევიწროებულია. აღინიშნება თავის ტკივილი, უძილობა, უმადობა. ტემპერატურა მატულობს 38,50 С, ზოგჯერ სუბფებრილურია. მასტოიდიტი შესაძლებელია განვითარდეს რამდენიმე დღეში, ზოგჯერ რამდენიმე კვირაში და თვეში.

მასტოიდიტი მწვავე – დიაგნოსტიკაში დიდი მნიშვნელობა აქვს რენტგენოლოგიურ გამოკვლევას. მკურნალობა კონსერვატულია: შუა ოტიტის მკურნალობა. ოპერაცია – ანტრომასტოიდოტომია ნაჩვენებია დვრილისებრ მორჩში გამოხატული დესტრუქციული ცვლილებების დროს; ოპერაციის აბსოლუტური ჩვენებაა პროცესის გადასვლა ტვინის გარსებზე, სიგმოიდურ სინუსზე ან ლაბირინთზე.

ყელ-ყურ-ცხვირის დაავადებები

ლიტერატურა, წყაროები, გაფრთხილება

  • გაფრთხილება
  • დათეშიძე ლალი, შენგელია არჩილ, შენგელია ვასილ. “ქართული სამედიცინო ენციკლოპედია”. თბილისი, 2005. “ტექინფორმის” დეპონენტი N: 1247. თეიმურაზ ჩიგოგიძის რედაქციით.
  • დათეშიძე ლალი, შენგელია არჩილ, შენგელია ვასილ; “ქართული სამედიცინო ენციკლოპედია”. მეორე დეპო-გამოცემა. ჟურნალი “ექსპერიმენტული და კლინიკური მედიცინა”. N: 28. 2006. დეპონენტი პროფესორ თეიმურაზ ჩიგოგიძის საერთო რედაქციით.

ლალი დათეშიძე, არჩილ შენგელია. სამედიცინო ენციკლოპედიური განმარტებითი ლექსიკონი

მწვავე მასტოიდიტი – (ყელ – ყურ – ცხვ. დაავ.) დვრილისებრი მორჩის ანთება. შუა ყურის მწვავე ანთება ზოგჯერ ვრცელდება დვრილისებრი მორჩის უჯრედზე, იწვევს მათ შორის ძგიდის დაშლას, რის შედეგადაც წარმოიქმნება ღრუ ჩირქით და გრანულაციებით. ძვლის დაზიანებამ შესაძლოა მიაღწიოს დვრილისებრი მორჩის ზედაპირს, სიგმოიდურ სინუსს, სახის ნერვს, ქალას შუა და უკანა ჩაღრმავებას, რითაც იწვევს ამა თუ იმ გართულებების განვითარებას. სიმპტომები. სხეულის ტემპერატურის მომატება (ზოგჯერ 39 – 40 გრადუსამდე), თავის ტკივილი, ყურის ტკივილი და მასში მოპულსირე ხმაური. სასმენი ხვრელიდან უხვი ჩირქოვანი გამონადენი, სასმენი მილის შევიწროება ძვლოვან ნაწილში, მტკივნეულობა დვრილისებრი მორჩის პალპაციისას. ზოგჯერ ვითარდება ყურის უკან შესიება, რომელიც განიცდის ფლუქტუაციას (ძვლისსაზრდელასქვეშა აბსცესი). დაგვიანებული მკურნალობის დროს შესაძლებელია ქალასშიდა გართულებების, სეფსისის, სახის ნერვის დამბლის, ლაბირინთიტის განვითარება. მკურნალობა იგივეა, რაც ჩირქოვანი შუა ოტიტის დროს, ანტიბიოტიკების აუცილებელი გამოყენებით, ყინული დვრილისებრ მორჩზე. წარუმატებელი მკურნალობის დროს – ყურზე ოპერაცია.

 

 

 

Share on Facebook
Facebook
გააზიარე facebook -ზე ..