კანის ქავილი

ლალი დათეშიძე, არჩილ შენგელია. სამედიცინო ენციკლოპედიური განმარტებითი ლექსიკონი

კანის ქავილი – (კანისა და ვენ. დაავ.) შეიძლება იყოს პირველადი, სხვადასხვა შინაგანი დაავადებით განპირობებული (სიყვითლე, დიაბეტი და სხ.), და მეორადი – როგორც ზოგიერთი დერმატოზის სიმპტომი. განასხვავებენ ქავილის რამდენიმე სახესხვაობას; ხშირად გვხვდება მოხუცებულობითი ქავილი, ქავილი უკანა გასავლის, სასქესო ორგანოების მიდამოში და ა.შ. მოხუცებულობით ქავილს ხშირად გააჩნია უნივერსალური ხასიათი, განსაკუთრებით ინტენსიურია წვივების, ბარძაყების და სხეულის მიდამოებში. არც თუ იშვიათად ის ვლინდება შეტევის მსგავსად, უხშირესად ჰიგიენური აბაზანების, შხაპის მიღების შემდეგ. განპირობებულია ტროფონევროზის, არც თუ იშვიათად ავიტამინოზების ფონზე კანის სიმშრალით (ცხიმოვანი ჯირკვლების ჰიპოფუნქცია). ნაფხანები ხელს უწყობენ მეორადი პიოდერმიების განვითარებას, შესაძლებელია ეგზემატიზაცია. უკანა გასავლის ქავილი, არც თუ იშვიათად, ტროფინევროზის გარდა განპირობებულია პარაპროქტიტით, პროსტატიტით, სწორი ნაწლავის პოლიპოზით, გლიური ინვაზიებით, ქრონიკული დიზენტერიით, სწორი ნაწლავის სფინქტერის მოდუნებით მასში სითხის დაცლის ფონზე, კანდიდოზებით და სხვ. უკანა გასავლის ქავილის გარდა, კანის ქავილის ლოკალურ ფორმებს მიეკუთვნება სასქესო ორგანოების ქავილი, განსაკუთრებით ხშირად სავნებოს ქავილი, იშვიათად მამაკაცის სასქესო ორგანოების. სასქესო ორგანოების ქავილის მიზეზი შეიძლება იყოს ტრიქომონიაზი, კანდიდამიკოზი და სასქესო ორგანოების ზოგიერთი სხვა ანთებითი პროცესი; არც თუ იშვიათად ის ვითარდება კლიმაქსის, ნევროზების, ისტერიების დროს, საკვერცხეების მოცილების და ჩასახვის საწინააღმდეგო საშუალებების გამოყენების შემდეგ. სასქესო ასოს (განსაკუთრებით მისი თავის) მიდამოში ქავილი, ზოგჯერ, განპირობებულია ქალის ვაგინალური სეკრეტის გამაღიზიანებელი ზემოქმედებით (მჟავიანობის მომატება), აგრეთვე ქიმიური წარმოშობის ჩასახვის საწინააღმდეგო საშუალებების გამოყენებით (ქინინი, ზოგიერთი მჟავე ხსნარები, პასტები და სხ.). ზოგჯერ კანის ქავილს თან სდევს მისი შესქელება, სურათის გაძლიერება, ზოლო შორსწასულ შემთხვევებში – ტიპიური ლიქენიფიკაცია და მნიშვნელოვანი ექსკორიაციები.

გაფრთხილება!