ქრომოსომების ტრანსლოკაცია – (translocatio chromosomatum ლათ.trans – გადაადგილება და locus – ადგილი) ქრომოსომების სტრუქტურული გარდაქმნის სახესხვაობა (იხ. ქრომოსომული აბერაციები), რომლის დროს ჰომო – ან არაჰომოლოგიურ ქრომოსომებს შორის რომელიმე სეგმენტი გადაადგილდება. უფრო ხშირად ეს ხდება ქრომოსომული სეგმენტების ურთიერთგაცვლით ე.წ. სომატური კროსინგოვერის პროცესში, აგრეთვე უჯრედებზე მუტაგენური ფაქტორების მოქმედების დროს. ქრომოსომების ტრანსლოკაციაა განვითარებადი სასქესო უჯრედების (იხ. მეიოზი) კროსინგოვერის მიმდინარეობის დროს. ქრომოსომების გარდაქმნის ეს ტიპი შესაძლებელია იმ შემთხვევაში, როდესაც ერთდროულად ხდება ორი გახლეჩა სხვადასხვა ქრომოსომაში. თუ ტრანსლოკაციის დროს შეერთდება ორი სეგმენტი, რომლებიც ცენტრომერებს შეიცავენ, წარმოიქმნება დიცენტრული ქრომოსომა, უცენტრომერო ორი სეგმენტის შეერთება ქმნის აცენტრულ ქრომოსომას. ტერმინი შემოიღო ბრიდჟესმა (1917). (ც. გაჩეჩილაძე, ნ. ჩიკვილაძე. ჰისტოლოგიის, ციტოლოგიის და ემბრიოლოგიის ტერმინთა განმარტებითი ლექსიკონი.”თბ.,”ცოდნა”.2000 წ.)
გაფრთხილება!
ლალი დათეშიძე, არჩილ შენგელია. სამედიცინო ენციკლოპედიური განმარტებითი ლექსიკონი
.