ფარმაკოთერაპიული აღწერები, გამოხმაურებები, აფთიაქები, ფასები, აქციები. 25 000 მედიკამენტი. ლალი დათეშიძის პროექტით 1996 წლიდან.
საერთაშორისო დასახელება (აქტიური ნივთიერება): ნიმესულიდი/nimesulide
აფთიაქები, ფასები, ფასდაკლებები …
კლინიკურ-ფარმაკოლოგიური ჯგუფი: ანთების საწინააღმდეგო არასტეროიდული საშუალებები
შემადგენლობა
ნეოსილის ერთი ტაბლეტი შეიცავს 100მგ ნიმესულიდს.
ფარმაკოლოგიური თვისებები
ნეოსილი არის ანთების საწინააღმდეგო არასტეროიდული საშუალება სულფონანილიდების ჯგუფიდან. ახასიათებს ანთების საწინააღმდეგო, ტკივილგამაყუჩებელი და სიცხის დამწევი მოქმედება, რაც გამოწვეულია ფერმენტ ციკლოოქსიგენაზა-2-ის შერჩევითი კონკურენტული ინჰიბირებით, რომელიც თრგუნავს პროსტაგლანდინების _ შეშუპების, ანთების და ტკივილის მედიატორების სინთეზს. გარდა ამისა, პრეპარატი თრგუნავს ხრტილოვანი ქსოვილის დამშლელი ფერმენტების (კოლაგენაზა, სტრომელიზინი, ელასტაზა) სინთეზს, რითაც აფერხებს ხრტილოვანი ქსოვილის დაზიანებას და ხელს უწყობს მისი სინთეზის რეგულირებას. შიგნით მიღების შემდეგ ნიმესულიდი კარგად შეიწოვება კუჭ-ნაწლავის ტრაქტიდან. საკვების მიღება ამცირებს აბსორბციის სიჩქარეს შეწოვის ხარისხის შეუცვლელად. სისხლის პლაზმაში ნიმესულიდის მაქსიმალური კონცენტრაცია მიიღწევა მიღებიდან 1,5-2,5 სთ-ის შემდეგ, ხოლო მისი მოქმედება გრძელდება დაახლოებით 6 საათის მანძილზე. ნიმესულიდის 99% უკავშირდება პლაზმის ცილებს, აქტიურად მეტაბოლიზირდება ღვიძლში, მეტაბოლიტების 80% გამოიდევნება შარდის მეშვეობით, ხოლო 20% _ ფეკალურ მასებთან ერთად.
ჩვენებები
> სახსრებისა და კუნთების დაავადებების დროს (სხვადასხვა გენეზის ოსტეოართრიტები, მათ შორის რევმატოიდული ართრიტი, ოსტეოართროზი, მაანკილოზებელი სპონდილიტი, ბურსიტი, ტენდენიტი);
> ტკივილების შესამსუბუქებლად პოსტოპერაციულ და პოსტტრავმულ პერიოდში, ოსტეოართრიტის, დაჭიმვისა და ღრძობის დროს განვითარებული ტკივილისა და ანთების სამკურნალოდ (ართრალგია, მიალგია);
> ინფექციურ-ანთებითი დაავადებებისას ოტოლარინგოლოგიაში;
> კბილის, თავის ტკივილისა და დისმენორეის (მტკივნეული მენსტრუაციის დროს).
> ცხელებით მიმდინარე დაავადებებისას (კომბინირებულ თერაპიაში ჩართვის სახით);
მიღების წესები და დოზები
ნეოსილი გამოიყენება მხოლოდ მოზრდილთა ასაკში.
ჩვეულებრივ ინიშნება 1 ტაბლეტი 2-ჯერ დღეში. პაციენტის მდგომარეობისა და მკურნალობის ეფექტურობის გათვალისწინებით შესაძლებელია დოზა გაიზარდოს 200 მგ 2-ჯერ დღეში. ტაბლეტი მიიღება ჭამის შემდეგ საკმარისი რაოდენობის წყალთან ერთად.
ასაკოვან პაციენტებში დოზის შერჩევა-შემცირება ხდება ექიმის მიერ პაციენტის მდგომარეობის გათვალისწინებით.
12 წლის ასაკის ზემოთ ბავშვებში ნეოსილის გამოყენება შეიძლება მხოლოდ ექიმის დანიშნულებით.
გვერდითი მოვლენები
ჩვეულებრივ ნეოსილი კარგად ამტანობით ხასიათდება, თუმცა შესაძლებელია განვითარდეს:
საჭმლის მომნელებელი სისტემის მხრივ: დისკომფორტი ეპიგასტრიუმში, გულისრევა, დიარეა.
ცნს-ის მხრივ: თავბრუსხვევა, თავის ტკივილი, უძილობა.
დერმატოლოგიური რეაქციები: გამონაყარი კანზე, ერითემა, ჭინჭრის ციება, ქავილი. იშვიათად შეიძლება განვითარდეს შარდვის შემცირება (ოლიგურია) სითხის შეკავებითა და ქსოვილების ადგილობრივი ან დიფუზური შეშუპებით.
ნეოსილმა, სხვა ანთების საწინააღმდეგო არასტეროიდული საშუალებების მსგავსად შეიძლება გამოიწვიოს სტივენს-ჯონსონის, ლაიელის სინდრომი, ასევე ანაფილაქსური რეაქციები
უკუჩვენება
> ნიმესულიდისა და პრეპარატის სხვა კომპონენტებისადმი მაღალი მგრძნობელობა.
> აცეტილსალიცილის მჟავას ან სხვა ანთების საწინააღმდეგო არასტეროიდული საშუალებებისადმი მაღალი მგრძნობელობა.
> კუჭისა და თორმეტგოჯა ნაწლავის წყლულოვანი დაავადება გამწვავების ფაზაში.
> ღვიძლის ან თირკმელების ფუნქციის ზომიერი ან გამოხატული დარღვევები.
> ორსულობა.
> ლაქტაცია.
> ბავშვებში 12 წლამდე.
განსაკუთრებული მითითებები
უსაფრთხოების ზომები:
ნეოსილი სიფრთხილით ინიშნება პაციენტებში სისხლის შემადედებელი სისტემის დარღვევით და კუჭ-ნაწლავის სისტემის დაავადებებით, ასევე პაციენტებში, რომლებიც იღებენ ანტიკოაგულანტებს ან ანტიაგრეგანტებს.
თირკმელების დარღვეული ფუნქციის მქონე ავადმყოფებში საჭიროა ნიმესულიდის დოზა შემცირდეს გორგლოვანი ფილტრაციის მაჩვენებლის გათვალისწინებით.
პრეპარატმა შესაძლოა ქსოვილებში სითხის შეკავება გამოიწვიოს, ამიტომ პაციენტებში გულის უკმარისობით ნიმესულიდის დანიშვნა სიფრთხილით უნდა მოხდეს. ნეოსილი სიფრთხილით ინიშნება ხანდაზმულ პაციენტებში, განსაკუთრებით მაშინ, როდესაც გამოხატულია ასაკობრივი სისუსტე.
სიფრთხილის დაცვაა საჭირო ნეოსილისა და ანტიკოაგულანტების, დიურეზული საშუალებების, ანტიჰიპერტენზიული პრეპარატების, ჰიპოგლიკემიური პრეპარატების, დიგოქსინის, ფენიტოინის, ლითიუმის პრეპარატების, სხვა არასტეროიდული ანთების საწინააღმდეგო საშუალებების, ციკლოსპორინის, მეთოტრექსატის ერთდროული დანიშვნისას. დოზის გადაჭარბებისას რეკომენდებულია სიმპტომური თერაპია (კუჭის ამორეცხვა, აქტივირებული ნახშირის მიღება).
გამოშვების ფორმა: 100მგ ტაბლეტი #20
გაცემის რეჟიმი: II ჯგუფი (გაიცემა ფორმა N3 რეცეპტით)
მწარმოებელი: ნეოფარმი, საქართველო