ლალი დათეშიძე, არჩილ შენგელია. სამედიცინო ენციკლოპედიური განმარტებითი ლექსიკონი
პატაუს სინდრომი – (K. Patau, ამრიკ. პედიატრი და გენეტიკოსი; სინ.: ტრისომია 13, ტრისომია D1, D ტრისომიის სინდრომი) თავის ქალას და სახის, ნერვული სისტემის, მხედველობის, სმენის ორგანოების, შინაგანი ორგანოების განვითარების თანდაყოლილი მანკების კომპლექსი, რომელიც განპირობებულია დამატებითი ქრომოსომის არსებობით მე – 13 წყვილში. ბავშვებში პატაუს სინდრომის დროს ვლინდება მიკროცეფალია დამრეცი შუბლითა და ნიკაპით, გამობურცული კეფით, გაპობილი ზედა ტუჩითა და სასით, დეფორმირებული ყურებით, მიკროფთალმიით ან ანოფთალმიით; აღინიშნება აგრეთვე კატარაქტები, კოლობომები, რქოვანას შემღვრევა, დაბალი კისერი, ჭარბი, ნაკეცებიანი კანით. პატაუს სინდრომისათვის პათოგნომურია თავის თმიანი ნაწილის კანის კეროვანი აპლაზია, პოლიდაქტილია, მოხრითი კონტრაქტურები, ფრჩხილების დისტროფია. აღინიშნება გულის, კუჭ – ნაწლავის ტრაქტის, საშარდე სისტემის და სხვა ორგანოების უხეში მანკები. პატაუს სინდრომიანი ბავშვების სიცოცხლისუნარიანობა მკვეთრად დაქვეითებულია და ისინი როგორც წესი იღუპებიან დაბადებიდან რამდენიმე დღის, ან თვის განმავლობაში. ქალები, რომლებმაც დაბადეს პატაუს სინდრომით ბავშვები საჭიროებენ კარიოლოგიურ გამოკვლევას. ორსულობა ანომალური ნაყოფით კი ექვემდებარება შეწყვეტას. ქალებისათვის, რომელთაც აღმოაჩნდათ ტრანსლოკაცია ბავშვის გაჩენა უკუნაჩვენებია.
ბმულები: 1.საავტორო ფარმაცევტული სკოლა 2.სამედიცინო ლიტერატურა 3.საპატრიარქოს ქართული უნივერსიტეტი 4.დიეტები 5.ორსულობა და მშობიარობა