ზესპირა

ფარმაკოთერაპიული აღწერები, გამოხმაურებები, აფთიაქები, ფასები, აქციები. 25 000 მედიკამენტი. ლალი დათეშიძის პროექტით 1996 წლიდან.

საერთაშორისო დასახელება: მონტელუკასტი/montelukast

აფთიაქები, ფასები, ფასდაკლებები …

კლინიკურ-ფარმაკოლოგიური ჯგუფი: ლეიკოტრიენების რეცეპტორების ანტაგონისტები

შემადგენლობა და გამოშვების ფორმა:
10მგ საღეჭი ტაბლეტი
ზესპირას ყოველი შემოგარსული ტაბლეტი შეიცავს:
10.4 მგ მონტელუკასტის ნატრიუმი
(რაც შეესაბამება 10 მგ მონტელუკასტს).
იგი ასევე შეიცავს ტიტანის დიოქსიდს, რკინის წითელ ოქსიდსა და რკინის ყვითელ ოქსიდს საღებავი ნივთიერებების სახით.

ფარმაკოლოგიური თვისებები:
მონტელუკასტი არის სელექციური და პერორალურად ეფექტური ლეიკოტრიენის რეცეპტორის ანტაგონისტი, რომელიც თრგუნავს ცისტეინილ ლეიკოტრიენის (CysLT 1) რეცეპტორს.
ცისტეინილ ლეიკოტრიენები (LTC 4, LTD 4, LTE 4) ანთების საწინააღმდეგო ძლიერი ეიკოზანოიდებია, რომელთა გამოთავისუფლებაც ხდება სხვადასხვა უჯრედებიდან, მათ შორის მასტოციტებიდან და ეოზინოფილებიდან. ეს მნიშვნელოვანი პროასთმური მედიატორები უკავშირდებიან ადამიანის სასუნთქ გზებში არსებულ ცისტეინილლეიკოტრიენის რეცეპტორებს CysLT. CysLT ტიპი-1 (CysLT 1) რეცეპტორი გვხვდება ადამიანის სასუნთქ ტრაქტში, მათ შორის სასუნთქი გზის გლუვი კუნთების უჯრედებში, საჰაერო გზის მაკროფაგებში და სხვა პროანთებით უჯრედებში (მათ შორის ეოზინოფილებსა და ზოგიერთ მიელოიდურ ღეროვან უჯრედებში). არსებობს ურთიერთკავშირი ასთმის პათოლოგიასა და CysLT -ს შორის. ასთმის დროს, ლეიკოტრიენით განპირობებული ეფექტები მოიცავს რესპირატორული ტრაქტის მხრივ რეაქციას, რომელთა შორისაა ბრონქოკონსტრიქცია, ლორწოს სეკრეცია, ვასკულარული გამტარობა და ეოზინოფილების კუმულაცია.
ნაჩვენებია, რომ ცხვირის სასუნთქი გზის რეზისტენტობა და ნაზალური ობსტრუქციის სიმპტომები იზრდება CysLT -ების ინტრანაზალური მიღებისას.
მონტელუკასტი არის ძლიერი და პერორალურად აქტიური ნაერთი, რომელიც მნიშვნელოვნად აუმჯობესებს ასთმასთან დაკავშირებულ ანთების პარამეტრებს. ბიოქიმიური და ფარმაკოლოგიური ბიოანალიზის მიხედვით, იგი სელექციურად და მაღალხარისხოვნად უკავშირდება CysLT 1 რეცეპტორს (უპირატესობა ენიჭება სხვა ფარმაკოლოგიურად მნიშვნელოვან სასუნთქი გზების რეცეპტორებს, როგორიცაა პროსტანოიდი, ქოლინერგული ან (ბეტა)-ადრენერგული რეცეპტორი). მონტელუკასტი CysLT 1 რეცეპტორზე ძლიერად თრგუნავს LTC4, LTD4, LTE4 ფიზიოლოგიურ მოქმედებებს ყოველგვარი აგონისტის მოქმედების გარეშე.

ფარმაკოკინეტიკა:
მონტელუკასტი სწრაფად და თითქმის სრულად აბსორბირდება პერორალური მიღების შემდეგ.
მოზრდილებში 10 მგ შემოგარსული ტაბლეტის მიღების შემდეგ მონტელუკასტის საშუალო უმაღლესი პლაზმური კონცენტრაცია (Cmax) მიიღწევა 3 საათში. საშუალო პერორალური ბიოშეღწევადობა შეადგენს 73%-ს.
მონტელუკასტი 99%-ზე მეტად უკავშირდება პლაზმურ ცილებს. მონტელუკასტის განაწილების სტაბილური მოცულობა შეადგენს საშუალოდ 8-11 ლიტრს. მონტელუკასტი ფართოდ მეტაბოლიზდება. თერაპიული დოზებით მიღებისას მონტელუკასტის მეტაბოლიტების პლაზმური კონცენტრაციების აღმოჩენა სტაბილურ მდგომარეობაში მოზრდილებსა და ბავშვებში შეუძლებელია. ადამიანის ღვიძლის მიკროსომების გამოყენებით ჩატარებული in vitro გამოკვლევები აჩვენებს, რომ ციტოქრომები P450 3A4 და 2C9 მონაწილეობენ მონტელუკასტის მეტაბოლიზმში. მონტელუკასტის პლაზმისმიერი კლირენსი შეადგენს საშუალოდ 45 მლ/წთ-ს ჯანმრთელ მოზრდილებში. მონტელუკასტი და მისი მეტაბოლიტები ექსკრეტირდება მხოლოდ ნაღველით.
მონტელუკასტის ფარმაკოკინეტიკა ქალებსა და მამაკაცებში ერთიდაიგივეა. დოზირების კორექცია საჭირო არ არის ხანდაზმულებში ან ღვიძლის საშუალო ან ზომიერი უკმარისობის მქონე პაციენტებში. არ არსებობს მონაცემები მონტელუკასტის ფარმაკოკინეტიკაზე ღვიძლის მწვავე უკმარისობის მქონე პაციენტებში. დოზის კორექცია თირკმლის უკმარისობის მქონე პაციენტებში საჭირო არ არის.

ჩვენებები:
ზესპირა ნაჩვენებია ასთმის პროფილაქტიკისა და ქრონიკული მკურნალობისათვის, ალერგიული რინიტის სიმპტომების (სეზონური და ყოველწლიური ალერგიული რინიტის) პრევენციისათვის მოზრდილებსა და ბავშვებში 2 წლის ასაკიდან.

მიღების წესები და დოზები:
ზესპირა მიიღება მხოლოდ დღეში ერთხელ. ასთმის ან ალერგიული რინიტის მქონე პაციენტებში ზესპირა მიიღება საღამოს.
მოზრდილები 15 წლის ასაკიდან: 10 მგ მიიღება დღეში ერთხელ ასთმის ან სეზონური ალერგიული რინიტის სამკურნალოდ.
ბავშვებში 6-დან 14 წლამდე: 5 მგ დასაღეჭი ტაბლეტი მიიღება დღეში ერთხელ ასთმის ან სეზონური ალერგიული რინიტის სამკურნალოდ. დოზის კორექცია საჭირო არ არის.
ბავშვებში 2-დან 5 წლამდე: 4 მგ (დასაღეჭი ტაბლეტი) მიიღება დღეში ერთხელ ასთმის ან სეზონური ალერგიული რინიტის სამკურნალოდ.
პრეპარატის ეფექტიანობა და უსაფრთხოება მრავალწლიანი ალერგიული რინიტის მქონე 6 თვემდე ასაკის ბავშვებში და ასთმით დაავადებულ 12 თვემდე ასაკის ბავშვებში დადგენილი არ არის.

ზოგადი ინფორმაცია
ზესპირას თერაპიული მოქმედება ასთმის კონტროლის მიზნით ვლინდება ერთ დღეში. ზესპირას მიღება შეიძლება უზმოზე ან ჭამის შემდეგ. ზესპირას მიღება უნდა მოხდეს მაშინაც, როდესაც ასთმური მდგომარეობა კონტროლის ქვეშაა და მაშინაც, როდესაც მათი მდგომარეობა გაუარესებულია.
დოზის კორექცია არ არის საჭირო ბავშვებში, ხანდაზმულებში, თირკმლის უკმარისობის მქონე პაციენტებში, ღვიძლის ფუნქციის საშუალო და ზომიერი მოშლილობისას.
თერაპია ზესპირას გამოყენებით ასთმის საწინააღმდეგო სხვა თერაპიებთან ერთად შესაძლებელია ზესპირას დამატება პაციენტის რუტინულ თერაპიულ რეჟიმში.

დოზის შემცირება კომბინაციური თერაპიისას
თერაპია ბრონქოდილატატორებით: იმ შემთხვევაში, თუ ბრონქოდილატატორით მონოთერაპიის შედეგად ვერ ხდება პაციენტის ადექვატური კონტროლის მიღწევა, შეიძლება დამატებული იყოს ზესპირა.
საინჰალაციო კორტიკოსტეროიდები: ზესპირა უზრუნველყოფს დამატებით კლინიკურ სარგებელს იმ პაციენტებისათვის, რომლებიც გადიან თერაპიას საინჰალაციო კორტიკოსტეროიდებით. კორტიკოსტეროიდის დოზა შეიძლება შემცირდეს ამტანობის მიხედვით. დოზის შემცირება ხდება თანდათან სამედიცინო მეთვალყურეობით. ზოგიერთ პაციენტში დასაშვებია კორტიკოსტეროიდებით თერაპიის უეცრად შეწყვეტა, რის შემდეგაც დაუყოვნებლივ უნდა დაიწყოს ზესპირას მიღება საინჰალაციო კორტიკოსტეროიდების ნაცვლად.

გვერდითი მოვლენები:
ზესპირა ზოგადად ხასიათდება კარგი ამტანობით. უმეტესად ზომიერი ხასიათის გვერდითი ეფექტების გამოვლენისას საჭირო არ არის თერაპიის შეწყვეტა. მონტელუკასტის გამოყენებისას გამოვლენილი გვერდითი ეფექტების შედარება ხდება პლაცებოს გამოყენებისას გამოვლენილ გვერდით ეფექტებთან.
პაციენტები 15 წლის ასაკიდან:
მონტელუკასტი შესწავლილ იქნა კლინიკური ცდებისას 15 წლის ზემოთ ასაკის დაახლოებით 2600 მოზრდილ პაციენტში. 2 პლაცებო-კონტროლირებულ 12-კვირიანი კლინიკური გამოკვლევისას, მონტელუკასტის თერაპიაზე მყოფ პაციენტთა 1%-ში, ერთადერთი გვერდითი ეფექტი, რომელიც უფრო ხშირად გამოვლინდა, ვიდრე პლაცებოს გამოყენებისას, იყო მუცლის ტკივილი და თავის ტკივილი.
კლინიკური გამოკვლევებისას მონტელუკასტით თერაპია გაიარა სულ 544 პაციენტმა 6 თვის განმავლობაში, 253 პაციენტმა 1 წლის მანძილზე და 21 პაციენტმა 2 წლის განმავლობაში; გვერდითი ეფექტების/არასასურველი მოქმედების მონაცემები არ შეცვლილა ხანგრძლივი თერაპიისას.
სეზონური ალერგიული რინიტი 15 წლის ასაკიდან:
მონტელუკასტი შესწავლილ იქნა 15 წლის ზემოთ ასაკის 2199 მოზრდილ პაციენტში კლინიკური ცდებისას. მონტელუკასტის ამტანობა ვლინდება ერთ დღეში და მისი უსაფრთხოების მონაცემები პლაცებოს ანალოგიურია. მოულოდნელი რეაქცია განვითარდა 1 ან მეტ პროცენტში, რაც გამოვლენილი არ ყოფილა.
პრეპარატის ბაზარზე განთავსების შემდეგ იშვიათად აღინიშნა შემდეგი არასასურველი რეაქციები:
ზოგადად ორგანიზმის მხრივ: ჰიპერმგრძნობელობის რეაქციები, მათ შორის ასთენია/დაღლილობა, გამოფიტვა, შეშუპება, ანაფილაქსია, ანგიოშეშუპება, ჭინჭრის გამონაყარი, ქავილი, გამონაყარი კანზე და მხოლოდ ერთ შემთხვევაში, ჰეპატური ეოზინოფილური ინფილტრაცია.
ნერვული სისტემის მხრივ: თავბრუსხვევა, ძილის დარღვევები, მათ შორის კოშმარები, ჰალუცინაციები, ძილიანობა, უძილობა, პარესთეზია/ჰიპოსთეზია, გაღიზიანება, აგრესიული ქცევა, აგზნება და შეტევები, მათ შორის შფოთვა.
ჩონჩხკუნთოვანი სისტემის მხრივ: მიალგია, მათ შორის ართრალგია და კუნთების სპაზმი.
კუჭნაწლავის ტრაქტის მხრივ: დიარეა, პირის სიმშრალე; დისპეფსია, გულისრევა და პირღებინება.
ღვიძლისა და ბილიარული ტრაქტის მხრივ: პლაზმური ტრანსამინაზას (ATS და ALT) მომატება და ქოლესტატიური ჰეპატიტი.
კარდიოვასკულარული სისტემის მხრივ: მომატებული სისხლდენა, ჩალურჯებები და პალპიტაცია.
მოულოდნელი გვერდითი ეფექტის განვითარებისას მიმართეთ ექიმს.

უკუჩვენება:
უკუნაჩვენებია იმ პაციენტებისათვის, რომლებსაც აღენიშნებათ მომატებული მგრძნობელობა პრეპარატის რომელიმე ინგრედიენტის მიმართ.

განსაკუთრებული მითითებები:
პერორალურად მიღებული მონტელუკასტის ეფექტურობა არ არის დადასტურებული ასთმის მწვავე შეტევების თერაპიისას. ამდენად, ასთმის მწვავე შეტევების თერაპიისათვის ზესპირა არ გამოიყენება და ამ შემთხვევისათვის პაციენტმა უნდა იქონიოს შესაბამისი პრეპარატი.
საინჰალაციო კორტიკოსტეროიდის დოზა სამედიცინო მეთვალყურეობით შეიძლება თანდათან შემცირდეს, თუმცა საინჰალაციო ან პერორალური კორტიკოსტეროიდის უეცრად ჩანაცვლება ზესპირათი არ შეიძლება.
ფიზიკური დატვირთვით გამოწვეული ბრონქოსპაზმის პროფილაქტიკისათვის უნდა გაგრძელდეს საინჰალაციო ბეტააგონისტის ჩვეულებრივი რეჟიმი, ხოლო განსაკუთრებულ შემთხვევაში, გამოყენებული უნდა იყოს ხანმოკლედ მოქმედი საინჰალაციო აგონისტი.
ის პაციენტები, რომლებსაც აღენიშნებათ მგრძნობელობა ასპირინის მიმართ, მონტელუკასტის გამოყენებისას უნდა მოერიდონ ასპირინის ან არასტეროიდული ანთების საწინააღმდეგო საშუალებების მიღებას. მიუხედავად იმისა, რომ მონტელუკასტი ეფექტურია რესპირატორული ტრაქტის ფუნქციების გაუმჯობესებისათვის ასთმის მქონე იმ პაციენტებში, რომლებიც მგრძნობიარენი არიან ასპირინზე, ნაჩვენებია, რომ ის აჩერებს ბრონქოკონსტრიქტორის რეაქციას ასპირინზე ან სხვა არასტეროიდული ანთების საწინააღმდეგო პრეპარატებზე.

ეოზინოფილური მდგომარეობები:
სისტემური ეოზინოფილია იშვიათად ვითარდება იმ პაციენტებში, რომლებიც იღებენ მონტელუკასტს, რაც ზოგჯერ გამოხატულია ვასკულიტის კლინიკური თვისებებით, რომლებიც შეესაბამება ჩარჯ-შტრაუსის სინდრომს. აღნიშნული მოვლენები ჩვეულებრივ ვითარდება პერორალური კორტიკოსტეროიდების შემცირების შედეგად. ყურადღება უნდა მიექცეს ეოზინოფილიის, ვასკულიტური გამონაყარის, პულმონური სიმპტომების გაუარესების, გულის მხრივ გართულებების და/ან ნეიროპათიის ნიშნებს. მიზეზ-შედეგობრივი კავშირი მონტელუკასტსა და ამ ძირითად მდგომარეობებს შორის დადგენილი არ არის. მიუხედავად ამისა, რეკომენდებულია სიფრთხილის გამოჩენა და სათანადო კლინიკური მონიტორინგი, როდესაც განიხილება სისტემური კორტიკოსტეროიდის დოზის შემცირება იმ პაციენტებში, რომლებიც იღებენ ზესპირას.

გამოყენება ორსულობისას
B კატეგორიის პრეპარატი:
მონტელუკასტი გამოცდილი არ არის ორსულ ქალებში. მისი გამოყენება ორსულობისას უკუნაჩვენებია, თუ მისი მიღება უკიდურესად აუცილებელი არ არის.

გამოყენება ლაქტაციის დროს
არ არის ცნობილი აღწევს თუ არა მონტელუკასტი დედის რძეში. ვინაიდან პრეპარატების უმეტესობა აღწევს დედის რძეში, ლაქტაციის დროს ზესპირას გამოყენებისას სიფრთხილე არის საჭირო.

გამოყენება ბავშვებში
ზესპირა გამოკვლეულია 6 თვიდან 14 წლამდე ასაკის ბავშვებში. ბავშვებში იგი არ აფერხებს ზრდის ტემპს. მისი უსაფრთხოება და ეფექტიანობა 6 თვემდე ასაკის ბავშვებში გამოკვლეული არ არის.

გამოყენება ხანდაზმულებში
კლინიკური გამოკვლევებისას ასაკთან დაკავშირებული სხვაობები განსაზღვრული არ ყოფილა მონტელუკასტის ეფექტიანობისა და უსაფრთხოების მონაცემების მხრივ.

ეფექტები ავტომობილების მართვისა და მექანიზმებით სარგებლობის უნარზე:
მონტელუკასტი არ აფერხებს ავტომობილების მართვისა და მექანიზმებით სარგებლობის უნარს. თუმცა, იშვიათად მონტელუკასტის გამოყენებისას აღინიშნება თავბრუსხვევა.

ჭარბი დოზირება:
ქრონიკული ასთმით დაავადებულთა გამოკვლევისას, მონტელუკასტი მიიღებოდა დოზით 200 მგ დღეში მოზრდილი პაციენტების მიერ 22 კვირის განმავლობაში, ხოლო მოკლევადიანი კვლევებისას – 900 მგ დღეში დაახლოებით ერთი კვირის განმავლობაში კლინიკურად მნიშვნელოვანი არასასურველი მოვლენების გარეშე. პრეპარატის ბაზარზე განთავსების შემდეგ და კლინიკური გამოკვლევებისას ბავშვებში დღეში მინიმუმ 150 მგ დოზით ზესპირას მიღებისას აღინიშნა მწვავე ზედოზირების შემთხვევები.
კლინიკური და ლაბორატორიული მაჩვენებლები შეესაბამებოდა მოზრდილ და ხანდაზმულ პაციენტებში უსაფრთხოების სურათს. არასასურველი მოვლენები ჭარბი დოზის მიღების უმრავლეს შემთხვევაში არ დაფიქსირებულა.
ყველაზე ხშირი არასასურველი რეაქცია იყო წყურვილი, ძილიანობა, მიდრიაზი, ჰიპერკინეზია და ტკივილი მუცლის არეში.
არ არის ცნობილი მონტელუკასტი გამოიდევნება თუ არა პერიტონეალური დიალიზით ან ჰემოდიალიზით.

სხვა წამლებთან ურთიერთქმედება:
ზესპირას გამოყენება შეიძლება სხვა თერაპიებთან ერთად, რომლებიც ჩვეულებრივ ტარდება ასთმის პროფილაქტიკისა და ქრონიკული მკურნალობისათვის. ურთიერთქმედების შემსწავლელი გამოკვლევებისას მონტელუკასტის რეკომენდებულ კლინიკურ დოზას არ გამოუწვევია კლინიკურად მნიშვნელოვანი ეფექტები შემდეგი პრეპარატების ფარმაკოკინეტიკაზე: თეოფილინი, პრედნიზონი, პრედნიზოლონი, პერორალური კონტრაცეპტივები (ეთინილესტრადიოლი/ნორეთინდრონი 35/1), ტერფენადინი, დიგოქსინი და ვარფარინი.
ფენობარბიტალთან ერთად მიღებისას მონტელუკასტის AUC შემცირდა დაახლოებით 40%-ით. ზესპირას დოზირების კორექცია საჭირო არ არის. მონტელუკასტი მეტაბოლიზდება ღვიძლისმიერი CYP3A4 ფერმენტის მეშვეობით. ამიტომ, მონტელუკასტთან ერთად ისეთი ძლიერი ციტოქრომ P450 ფერმენტების ინდუქტორების გამოყენებისას როგორიცაა ფენობარბიტალი ან რიფამპინი, აუცილებელია სათანადო კლინიკური მონიტორინგი.
კრაზანამ შეიძლება შეამციროს მონტელუკასტის პლაზმური დონეები.

შენახვის პირობები:
ინახება 25ºC -მდე, სინათლისაგან და ტენიანობისაგან დაცულ ადგილას.
ინახება საკუთარ შეფუთვაში ბავშვებისათვის მიუწვდომელ ადგილას.

ვარგისიანობის ვადა:
3 წელი
აფთიაქში გაცემის წესი:
ფარმაცევტული პროდუქტის ჯგუფი II – გაიცემა მხოლოდ რეცეპტით.
არ გამოიყენება ექიმთან კონსულტაციის გარეშე.

მწარმოებელი: BILIM PHARMACEUTICALS, თურქეთი

გაფრთხილება