ბავშვი 1 წლისა და 6 თვის ასაკში

ბავშვის ფიზიკური განვითარება 1 წლისა და 6 თვის ასაკში

ამ პერიოდში, ბავშვი რამდენიმე თვეა, დადის და ფეხზე გაცილებით უკეთ დგას. უკვე ნაკლებად ეცემა, კარგად ბრუნდება გვერდით, უკეთ უკავია სათამაშოები და სიარულის დროს თამაშობს კიდეც; ადვილად ინარჩუნებს წონასწორობას. ამ ასაკის ბავშვებს ძალიან უყვართ აძრომა კიბეზე, სხვადასხვა ავეჯსა თუ ნივთზე, ყველაფერზე, რაზეც მიეცემათ ამის საშუალება. ბავშვს ამ სიამოვნებას ნუ მოაკლებთ. ამით იგი გადის ძალზე საჭირო პრაქტიკას და იძენს აუცილებელ ჩვევებს.

ოღონდ, რა თქმა უნდა, ეს ყოველივე თქვენი მეთვალყურეობის ქვეშ და უსაფრთხო პირობებში უნდა ხდებოდეს. თანადათან, ბავშვი იძენს სხვა, შედარებით რთულ მოტორულ ჩვევებსაც, როგორიცაა: ხტუნვა და სირბილი.  ამ პროცესში მას ემატება როგორც ფიზიკური ძალა, ისე თავდაჯერებულობა და დამოუკიდებლობაც.

♥ ბავშვის სათამაშოები ,,ამაზონზე” >>>>>

წლინახევრის ბავშვები გამოირჩევიან საოცარი ენერგულობითა და განუწყვეტელი მოძრაობის სურვილით, რაც ბუნებრივი და აუცილებელი პროცესია. ამით გამოიმუშავებენ არა მარტო აუცილებელ მოტორულ ჩვევებს, არამედ მოძრაობის კოორდინაციასაც იუმჯობესებენ. ამ ასაკში მას უკვე შეუძლია კოშკის აშენება 3–4 კუბიკით, ბურთის გადაგდება, თოკზე  გამობმული სათამაშოს ტარება, სათამაშოს, ასევე სხვა ნივთის დადება და აღება, წიგნის გვერდების გადაფურცვლა, კარის სახელურის მოქაჩვა და კარის გაღება, სუფრის ნივთების გამოყენება (ოღონდ არა ისე მოხერხებულად, როგორც თქვენ გინდათ), სასმეველადან წყლის დამოუკიდებლად დალევა და ხატვაც კი.

ამავე დროს, ბავშვი ბუნებრივად სწავლობს თამაშის ახალ პრინციპებს და ძველ სათამაშოებს ახლებურად იყენებს. თუ დაკვირვებიხართ, ჩვეულებრივი კუბიკი შესაძლოა ,,გადააქციოს”  გემად ან თვითმფრინავად, თოკზე გამობმული სათამაშო – საბავშვო ეტლად, პლასტილინი – ფუნთუშად და ა.შ. ყურადღება მიაქციეთ, როგორ განახორციელებს თქვენი პატარა თავის წარმოსახვას და ამავე დროს, უკვე გამომუშავებული მოტორული ჩვევები როგორ უწყობს ხელს – თამაშს შემოქმედებითად მიუდგეს.

რამდენჯერ გითხოვიათ პატარასთვის – ცოტა ხნით მაინც დაეთმო თქვენთვის ყურადღება ან თავისი სათამაშო? თუმცა, უნდა გავითვალისწინოთ, რომ სიტყვა ,,დათმობა”  წლინახევრის ბავშვისთვის არ არსებობს. მას ღრმად სჯერა, რომ სწორედ იგი წარმოადგენს მთელი სამყაროს ცენტრს და მხოლოდ მისთვის არის განკუთვნილი ყველა სათამაშო (მათ შორის – სხვისი სათამაშოებიც) და ყველა გარშემო მყოფი ადამიანის ყურადღება. სინამდვილეში, განვითარების ამ ეტაპზე ბავშვს მკვეთრად გამოკვეთილი ეგოცენტრული ხედვა ახასიათებს. იგი 100 პროცენტით დარწმუნებულია, რომ ყველა მასავით ფიქრობს და გრძნობს. სანამ თქვენი პატარა არ ისწავლის სხვისი განცდებისა და ინტერესების გათვალისწინებას, იგი ყოველთვის უხეში იქნება სხვა ბავშვების მიმართ, თუ მათში კონკურენტი შენიშნა. თუ დაინახა, რომ სხვა ბავშვი იღებს მის სათამაშოს, არ მოერიდება, უხეშად წაართვას ან ხელითაც კი უბიძგოს ,,მოწინააღმდეგეს”.

თუ ცდილობთ, რომ თქვენი შვილი, თამაშის გამო, სხვა ბავშვებთან ჩხუბს გადააჩვიოთ, სასურველ შედეგს არ უნდა ელოდეთ: წლინახევრის ბავშვისთვის არსებობს ერთადერთი პრინციპი – ,,რაც ჩემია, ჩემია”!  მის მიერ სხვათა სათამაშოების მითვისება და საკუთარი სათამაშოს კბილებით დაცვა სხვა არაფერია, თუ არა საუკეთესო საშუალება – დაამტკიცოს საკუთარი ავტონომიურობა, დამოუკიდებლობა, გაარკვიოს საკუთარი შესაძლებლობის საზღვრები და ისწავლოს საკუთარი ინტერესების დაცვა.

ბავშვის ინტელექტუალური განვითარება 1 წლისა და 6 თვის ასაკში

სწორედ წლინახევრის ასაკში იწყებს ბავშვი ისეთი ცნობილი კითხვის ხშირად დასმას, როგორიცაა: `ეს რა არის~? აბსოლუტურად ყველაფერზე, რაც მისი მხედველობის არეში მოხვდება,  ამ კითხვას სვამს. სურვილი, გაიგონ გარშემო მყოფ ადამიანთა ან სხვადასხვა ნივთის  სახელი, მკვეთრად აუმჯობესებს 18–20 თვის ბავშვების ლექსიკურ მარაგს.

განვითარების ამ ფაზაში, ისინი დღის მანძილზე რამდენიმე ახალ სიტყვას სწავლობენ (შეიძლება გაგაგიჟოთ კიდეც, დღის მანძილზე იმდენ და ისეთ უცნაურ რამეს ამბობს ბავშვი). ყველაზე მნიშვნელოვანი ისაა, რომ ამ პროცესში ბავშვი მშობლიურ ენას ახალი სიტყვების ხშირად გამეორებით სწავლობს. მას ძალიან მოსწონს მარტივი სიმღერები, რომლის სიტყვებიც, ასე თუ ისე, ადვილად აღსაქმელია; მოსწონს საინტერესო და სახალისო სიტყვებზე აგებული თამაშები. ცდილობს, ხშირად გაიმეოროს ახალი სიტყვები დაძინების წინ, ან სეირნობისას; ასე რომ, არ გაგიკვირდეთ, თუ თქვენი პატარა რაღაც სიტყვებს, გარკვეულ ფრაზას ამოიჩემებს და წამდაუწუმ იმეორებს. ბავშვები ქვეცნობიერად, მაგრამ ნათლად გრძნობენ სიტყვების ძალას; ეს ეხმარება, მიიღონ ის, რაც სურთ ან სჭირდებათ.

აღებულია საიტიდან – http://best-nyanya.ru/periody14.htm 

________________________________________

გადასვლა >>>  ,,ბავშვი”

..